Dr.sabin Nsanzimana yatangaje ko ibiti n’ubusitani bifatwa nk’umuti ukomeye k’ubuzima bwacu
Kuri uyu wa 25 ugushyingo 2023 ,mu Karere ka Bugesera ,Minisiteri y’ubuzima kubufatanye na Minisiteri y’ibidukikije batangije ku mugaragaro gahunda yiswe Green Hospital initiative ( ivuriro riri ahatoshye ) ni igikorwa cyahuriranye n’umuganda rusange Aho abaturage n’abayobozi batandukanye bateye ibiti bisaga 1400 mu kigo Nderabuzima cya Ntarama.
Minisitiri w’ubuzima Dr. Sabin Nsanzimana yavuzeko mu bushakashatsi bwakozwe bwagaragajeko ko ibiti n’ubusitani bisigaye bibarwa nk’umuti uvura , byagiye bigaragara ko abarwayi barwariye mu mavuriro cyangwa ibitaro bifite ubusitani bwiza, n’ibiti bataha mbereho iminsi ibiri ( 2) mu gihe bagombaga kumara mu bitaro,ikindi ibiti bisukura umwuka wacu ,mu bihaha hakajyamo umwuka mwiza.
Ni umuganda witabiriwe n’abayobozi bo mu nzego za Leta zitandukanye ndetse n’abafatanyabikorwa batandukanye, barimo Minisitiri w’Uburinganire n’Iterambere ry’Umuryango, Dr. Valentine Uwamariya, Minisitiri w’Ubuzima, Dr. Sabin Nsanzimana, Guverineri w’Intara y’Iburasirazuba, Dr Jeanne Nyirahabimana,Abahagarariye inzego z’umutekano RNP, RIB, n’uhagarariye Umuryango w’Abibumbye mu Rwanda, Dr. Ozonnia Ojielo.
Minisitiri w’Uburinganire n’Iterambere ry’Umuryango, Dr. Valentine Uwamariya na we wari witabiriye uyu muganda, yavuze ko ari byiza kugira umuryango utekanye, utuye heza ndetse unafite ubuzima bwiza.
Yagize ati: “Nishimiye kubana namwe mu gikorwa cy’umuganda dushoje cyo gutera ibiti tugakora n’umuhanda igikorwa cyahuriranye na Gahunda yo gutangiza iminsi 16 yo kurwanya ihohoterwa rishingiye ku gitsina ,gutera ibiti rero bijyanye no kurinda ibidukikije ,kongera
amashyamba mu Gihugu Kugira ngo habemo umwuka mwiza.
Dr.Valentine Uwamaliya yibukije abanyarwanda ko uyu mwaka dufite insanganyamatsiko igira iti “Dufatanye Dukumire ihohoterwa rishingiye ku gitsina ” njyewe , wowe ,umuturanyi ,urubyiruko abakuru n’ababyeyi, kuko Ntitwagira umuryango utekanye Kandi ushoboye tugifite ihohotera.
Guverineri w’Intara y’Iburasirazuba, Dr Jeanne Nyirahabimana yasabye abaturage ba Bugesera gukomeza kujyana n’icyerekezo cy’Akarere batuyemo cyo kuba ahantu heza hatoshye, ngo kuko Bizana ubuzima bwiza.
Yagize ati: “tujyanye n’icyerekezo cya bugesera itoshye, ibyo murabyibuka? Tugire Bugesera itoshye, Bugesera irimo ibiti byinshi, ibiti byinshi ku bigo by’ubuzima, ibiti byinshi no ku mashuri, tube ahantu hatoshye kandi hasukuye.”
Umuyobozi w’Akarere ka Bugesera, MUTABAZI Richard, yashimiye abitabiriye uyu muganda ndetse n’abatekereje gutangiriza iki gikorwa cyo gutera ibiti ku mavuriro mu karere ayoboye, aho yabijeje ko we n’abaturage ayoboye bazakomeza ibyo bikorwa ndetse bakarinda n’ibyakozwe.
Yagize ati: “Twagira ngo tubashimire kuba mwaratoranyije kuza gutangiriza ibi bikorwa by’ingenzi muri uyu muganda mu Karere kacu ka Bugesera, ntabwo tubifata nk’ibisanzwe biduteye ishema kandi natwe biratuma twongera imbaraga muri ibyo bikorwa, ari ukubikora ndetse no kubirinda,..turashima Minisiteri y’Ubuzima ku gutangiriza iki gikorwa hano mu karere kacu ka Bugesera, muri uyu murenge wa Ntarama, ku kigo nderabuzima…gutera ibiti muri gahunda yo gutuma aho tuvurirwa haba ubuhumekero bwiza, haboneka umwuka mwiza.
Gahunda ya Green Hospital Initiative yateguwe na Minisiteri y’Ubuzima ku bufatanye na Minisiteri y’Ibidukikije, ikaba ari gahunda biteganyijwe ko izasozwa mu gihugu hose hatewe ibiti bingana na miliyoni ebyiri, bikaba bizaterwa mu mavuriro arimo; ibitaro 56, ibigo nderabuzima 514, na Poste de santé 1252, ndetse kugeza ubu hamaze guterwa biti bisaga ibihumbi 20, naho mu Karere ka Bugesera ku kigo nderabuzima cya Ntarama hakaba hatewe ibiti 1400.
By: Abawedawe Immaculée
