Kwibuka 31#kimisagara bibutse abazize Jenoside yakorewe Abatutsi mu 1994, banagaruka ku bugome bw’indengakamere bwaranze Karushara
Kuri uyu wa Gatatu ,Taliki 16 Mata 2025 mu murenge wa Kimisagara nibwo habereye igikorwa cyo kwibuka ku nshuro ya 31 jenoside yakorewe Abatutsi mu 1994, ni igikorwa kitabiriwe n’abayobozi banyuranye, inzego z’umutekano, imiryango y’Abazize Jenoside n’abaturage biganjemo abatuye muri uyu murenge.
Mu 1994 ,by’umwihariko kuri iyi tariki ya 16 Mata 1994 ni umunsi mubi utazibagirana ku Batutsi bari mu yitwaga Segiteri Kimisagara kuko mbere yaho ku itariki ya 15 Mata 1994 umugore wari Konseye w’iyo Segiteri witwaga Karushara Rose afatanyije na Radio RTLM, bashishikarije Abatutsi bari bataricwa bari bihishe mu ngo no muri ruhurura ya Mpazi kuvamo, bababwira ko ubwicanyi bwarangiye, babizeza kubarindira umutekano ariko bagamije kubicisha, iyo Taliki hishwe Abatutsi benshi bigizwemo uruhare na Karushara akaba ari na yo mpamvu Umurenge wa Kimisagara wafashe iyi tariki nk’iyihariye yo kwibukiraho.
Ibikorwa byo Kwibuka Jenoside yakorewe Abatutsi mu Murenge wa Kimisagara byabanjirijwe no gushyira indabo ku rwibutso rwa Jenoside rwa Kigali mu rwego rwo kunamira Abazize Jenoside bahashyinguye.
Nyuma yo gushyira indabo kuri urwo rwibutso, ibikorwa byo kwibuka byakomereje ku kibuga cy’urusengero rwa Restoration Church Kimisagara.
Umunyamabanga Nshingwabikorwa w’Umurenge wa Kimisagara, Jean Damescene Ufiteyezu, mu ijambo rye, yongeye gufata mu mugongo imiryango y’abarokotse Jenoside yakorewe Abatutsi mu 1994 mu bo Murenge wa Kimisagara, yibutsa ko iyo hatabaho ubuyobozi bubi, Jenoside itari gushoboka.
Depite Kalisa Jean Sover,Yagaye cyane uwari Umuyobozi wa Segiteri Kimisagara, Karushara Rose, kubera uruhare runini yagize mu bukangurambaga n’ishyirwa mu bikorwa rya Jenoside. Yanashimiye ubuyobozi bwa FPR Inkotanyi bwongeye kugarura ubumwe bw’Abanyarwanda no guharanira ko Jenoside itazongera ukundi.
Kamayerese Jean D’Amour umuyobozi wa Kigali Leather Cluster( ihuriro ry’abakora ibikomoka kumpu mu Rwanda yagize ati “Twahuye n’ibibazo ,twarahungabanye cyane ariko byibuze turasaba ababigizemo uruhare ko batwereka abacu twabuze aho babashyize . Yanashimiye cyane Nyakubahwa perezida Paul Kagame ko yatuzaniye ubumwe ubu twese twabaye Abanyarwanda ntaby’amako bikwiriye kuturanga
Jean D’Amour yasabye urubyiruko,cyane urukoresha imbuga nkoranyambaga kurwanya Ingengabitekerezo, kuko ntamuntu ugomba kozongera kudusubiza mu icuraburindi ukundi.
Umuyobozi Nshingwabikorwa Wungirije w’Akarere ka Nyarugenge, Madamu Uwamahoro Jenevieve, yagaragaje ko nubwo amateka ya Jenoside muri Kimisagara agaragaza ubugwari bukomeye, n’ibikorwa bibi by’indengakamere byari bishyigikiwe n’abari abayobozi, kuri ubu hari icyizere ko bitazongera, kuko Igihugu gifite ubuyobozi bwiza.
Yasabye abarokotse Jenoside yakorewe Abatutsi kudaheranwa n’agahinda, ahubwo abashishikariza gushikama bagakora cyane kugira ngo bagere ku ntego abagiye basize batagezeho. Uyu muyobozi na we yashimye Inkotanyi. Ati “Kubera Inkotanyi, uyu munsi turahagarara tukavuga amazina y’abacu tukababwira ko batazigera bibagirana, tukababwira ko twakuze, twibarutse kandi ko twubaka Igihugu twizera ko ejo hazaza hacu Ari heza.
By : ABAWEDAWE Immaculee
