#Kwibuka30 : umurenge wa Kigali wibutse abazize genoside yakorewe Abatutsi bakajugunywa mu ruzi rwa Nyabarongo
Kuri uyu wa 27 Mata 2024 , Mu karere ka nyarugenge mu murenge wa Kigali bibutse ku nshuro ya 30 genoside yakorewe Abatutsi mu 1994 bakajugunywa mu ruzi rwa Nyabarongo.
Mu murenge wa Kigali hibutswe inzirakarengane z’Abatutsi 755 bari batuye mur’uyu murenge bishwe muri Jenoside bakajugunywa muri Nyabarongo.
Umunyamabanga Nshingwabikorwa w’Umurenge wa Kigali NTIRUSHWA Christophe yihanganishije imiryango y’Abazize Jenoside by’Umwihariko abari batuye muri Komine Butamwa abizeza ko Jenoside itazongera kubaho ukundi
Agira ati:” Turi hano twibuka amazina y’Abatutsi bazize Jenoside, Twibuke twiyubaka kuko nta joro ridacya nta n’akabi kadashira”.
Akomeza agira ati:”Jenoside ntizasubira kubaho ukundi nk’uko ari intego y’Igihugu cyacu, turi hano twibuka ariko twamagana n’imvugo mbi zahembereye urwangano rwaganishije kuri Jenoside aho twavuga nk’imvugo ya Leon Mugesera wavuze ngo mu 1959 nuko yari akiri umwana baba baranyujije Abatutsi muri Nyabarongo bagasubira iwabo muri Ethiopiya”.
Asoza yihanganisha imiryango y’Abatutsi bazize Jenoside abakomeza ndetse anashimira Ingabo zari iza RPF Inkotanyi zari ziyobowe na Perezida Paul Kagame kuba zarahagaritse Jenoside.
Umuyobozi Nshingwabikorwa w’Akarere ka Nyarugenge NGABONZIZA Emmy avuga ko Jenoside nubwo ari amateka mabi ariko akwiriye kugenderwaho kugira ngo Abanyarwanda biyubake.
Agira ati:” Nyuma ya Jenoside yakorewe Abatutsi, nyuma yo kubura Uburere u Rwanda rugasenyuka, Abanyarwanda bakicwa na bagenzi babo, nyuma y’ibyo byose ubu Abaturage dufite icyerekezo kimwe cyo guharanira kunga Ubumwe no gushyira hamwe”.
Umuyobozi w’Umujyi wa Kigali wungirije ,Urujeni Martine avuga ko ikibi (Jenoside) cyatsinzwe kandi uwagitsinze ntaho yagiye.
Agira ati:” Ntimuzemere ko abapfobya Jenoside babatobera ngo babasubize inyuma, Ikibi cyaratsinzwe Kandi uwagitsinze ntaho yagiye, ikiniga nigishire, dutwaze kandi twiyubake”.
Akomeza avuga ati:”Nyabarongo n’indi migezi ibumbatiye amateka yacu, biteye ubwoba n’agahinda ariko ntidukwiye guheranwa n’agahinda”.
Asoza agira ati:”Abatanga ubuhamya batangira bavuga bati:” Turashimira Inkotanyi n’Umugaba w’Ikirenga Perezida Paul Kagame, kubera ko Inkotanyi zamenye Amaraso zibohoza uru Rwanda, bari bato ariko ntibabaye gito, iyo tubibuka tuba twongera guhamya ko tutazatatira Igihango dufitanye n’abo, twebwe nk’ubuyobozi bw’Umujyi wa Kigali tuzakomeza gukemura ibibazo biremereye ku Bacitse ku icumu kugira ngo boroherwe n’ubuzima, Mukomere, Twibuke twiyubaka”.
Interahamwe yitwaga Setiba afatanyije n’Abasirikare ba Leta yariho icyo gihe bishe Abatutsi bari batuye mu cyahoze ari Butamwa babatema abandi babatera Grenade hanyuma abandi bakabaroha muri Nyabarongo.
Urwibutso ruri kuri Nyabarongo-Ruliba rwanditseho amazina y’Abatutsi 755 bishwe bakajugunywa muri Nyabarongo, uyu munsi bakaba bibutswe, bakunamirwa n’Abatuye mu Murenge wa Kigali nk’Ikimentetso cyo kubasubiza icyubahiro bambuwe .
By: Abawedawe Immaculée
