Kigali Leading TSS yatangije umwaka w’amashuri ,inaha Buruse abanyeshuri 11 bagiye kwiga muri Mauritius
By : Abawedawe Immaculée
Kuri uyu wa 27 Ukwakira 2023 ,ikigo cya Kigali Leading TVET School cyatangije umwaka w’amashuri , kinatanga ku mugaragaro ibyangombwa by’abanyeshuri 11 bagiye gukomeza amasomo ya Kaminuza mu gihugu cya Mauritius, akaba Ari Buruse (schorship) bashakiwe niki kigo cya Kigali Leading TVET Technical secondary school ,bakazurira indege kuwa 29 ukwakira 2023 berekeza Mauritius.
Ni umuhango wari unogeye ijisho, waranzwe no kugaragaza impano zitandukanye z’abana babyina imbyino za kinyarwanda niza kizungu, abazi kwigana abahanzi batandukanye , umwana w’umukobwa uzi gukora isabune yifashishwa mu koza munzu , amasahani ..
Umuyobozi Mukuru wungirije w’ishuri rya Kigali Leading TSS AHAMED KATAMARA, avuga ko iki kigo ahagarariye kimaze kugaragaza ubudasa mu Rwanda no mu mahanga, bitewe ahanini n’ubumenyi abahiga bakomeje kugaragaza, bakaba ngo n’iyo bageze mu bihugu byo hanze bifitanye imikoranire n’ishuri, batsinda neza amasomo bityo bakagaruka barwanirwa n’ibigo bitandukanye bishaka kubaha akazi.
Uwase Favour ugiye kwiga mu ishami ry’Ubukerarugendo n’ Amahoteli yagize ati “Ndashimira Kigali Leading TSS kumpugura neza bakampa ubumenyi bukwiriye kandi turabashimira ku bufatanye bwabo. Intego mfite ni uko ngiye kongera ubumenyi burenze kubwo mfite kugirango nzabashe kugaruka mu gihugu mfite izindi mpamyabumenyi kugirango nzashyigikire igihugu cyanjye ngiteza imbere.
Tuyizere Alphonse, umuyobozi wa Kigali Leading TSS avuga ko bafite umwihariko wo gushyira imbere kuvuga indimi mpuzamahanga no gukorana n’abafatanyabikorwa.
Agira ati “Mu by’ukuri hano hanze hari amashuri menshi yigisha TVET ariko umwihariko wa Kigali Leading TSS ni uko dufite abarimu beza cyane b’intangarugero kandi bafite ubumenyi babyize. Icya kabiri dushyira imbere ni uko abana babasha kuvuga indimi mpuzamahanga zitandukanye, icya gatatu abana bacu mu bizamini bya Leta baratsinda 100% icya kane ni uko dukorana n’abandi bafatanyabikorwa ntabwo twakora turi ishuri gusa niba twigisha ikintu nihe umwana wacu azimenyereza umwuga? nihe umwana wacu azabona akazi?niba twigisha segonderi nihe azakomereza Kaminuza? akabona buruse. Si n’abo ngabo bo muri Mauritius gusa dufite n’abandi b’abanya Canada n’abahorandi abo nabo tugiye gusinyana amasezerano y’imikoranire kugirango tujye tuboherereza abanyeshuri.”
Ikigo cya Kigali Leading TSS cyatangiye mu mwaka wa 2013 ifite amashami ane atandukanye ariyo Ubukanishi bw’imodoka, Amahoteli n’Ubukerarugendo n’ikoranabuhanga. Hamaze gusohoka abanyeshuri barenga 3400 muri abo bose 78,6% bafite akazi. Abanyeshuri bamaze kujya muri Mauritius bose ni 130 abamaze kurangirizayo amasomo ni 119.
